Sunday, 25 June 2017

தலைப்பிறைக்காக பிரிவினை வேண்டாம்


நேற்றைய தினம் அகில இலங்கை ஜம்மியதுல் உலமாவின் ஏகோபித்த தீர்மானத்தின்படி இலங்கையில் எங்கும் பிறை தென்படாததன் காரணமாக ரமழானை முப்பதாக பூர்த்தி செய்து நாளை திங்கட்கிழமை (26/06/2017) பெருநாள் தினமாக அறிவிக்கப்பட்டுள்ளது. எனினும் உலகின் ஏனைய பல நாடுகளில் பிறை தென்பட்டதால் இன்று ஞாயிற்றுக்கிழமை பெருநாள் கொண்டாடப்படுகின்றது. அதன்படி இலங்கையிலும் சர்வதேசப் பிறையினை அடிப்படையாகக் கொண்டு சிலர் இன்று பெருநாள் கொண்டாடுகிறார்கள். இவர்கள் ஜம்மியதுல் உலமாவின் முடிவுக்கு மாறாகவே இந்த பெருநாளை கொண்டாடுகின்றார்கள். எம் சமூகத்திடையே நாளாந்தம் பிரிவினைகள் அதிகரித்துக் கொண்டே போகின்றன. இந்தப் பிரிவினை எமது சமூகத்திற்கு ஆரோக்கியமானதல்ல.

உண்மையில் அகில ஜம்மியதுல் உலாமாவின் எந்தவொரு செயற்பாடுகளும் முஸ்லிம் சமூகம் திருப்திப்படும் அல்லது முஸ்லிம் சமூகத்துக்கு பொருத்தமானதாக இல்லை என்பதில் எனக்கும் மாற்றுக் கருத்துக்கள் இல்லை. நான் அடிக்கடி கூறுவது போல அங்கு இருப்பவர்களில் பெரும்பாலானோர் அறபு மொழியை படித்தவர்களே தவிர அங்கு மிகவும் இஸ்லாமிய உலமாக்கள் குறைவானவர்களே இருக்கின்றார்கள்.

அறபு மொழியில் உலமா என்றால் துறைசார்ந்த நிபுணர்கள் என்பது அர்த்தம். அங்கு உள்ளவர்கள் அறபு மொழியில் உலமாக்களாக இருக்கலாமே தவிர இஸ்லாமிய மார்க்க விடயத்தில் உலமாக்கள் (துறைசார்ந்த நிபுணர்கள்) குறைவானவர்களே இருக்கன்றார்கள். அதன்படி அவர்கள் எடுக்கும் முடிவுகள், அவர்களுடைய நடவடிக்கைகள் எதுவும் முஸ்லிம் சமூகத்துக்கு பொருத்தமானதாக இல்லை.

என்றாலும் ஜம்மியதுல் உலமாவையோ அல்லது அங்கிருக்கும் அறபு படித்தவர்களையோ (மௌலவிமார்களை) மாத்திரம் முழுமையாக நாம் குறை கூறிக் கொண்டு இருக்க முடியாது. இதற்கு இலங்கை வாழ் முழு முஸ்லிம் சமூகமும் பொறுப்புக் கூற வேண்டும் என்பதே எனது கருத்து.

இன்று சமூகத்தில் உள்ள பெரும்பாலான மௌலவிமார்கள் 07ம் ஆண்டு அல்லது 08ம் ஆண்டு வரை படித்தவர்களே. அதேபோன்று அறபு மத்ரசாக்களில் சேர்த்துக் கொள்வதற்காக, 07ம் ஆண்டு அல்லது 08ம் ஆண்டு சித்தியடைந்திருக்க வேண்டும் என்பதே அதிகூடிய தகைமையாக கேட்கப்படுகிறது. அதுமட்டுமன்றி பாடசாலைகளில் ஒழுங்காக கல்வி கற்காத பிள்ளைகளை அல்லது பெற்றோரால் கட்டுப்படுத்த முடியாத பிள்ளைகளையே மத்ராசாக்களுக்கு சேர்க்கும் வழக்கம் எமது சமூகத்தில் உள்ளது. நன்றாக படிக்கும், திறமையான பிள்ளைகளாக இருந்தால் டாக்டராகவோ, இஞ்சினியராகவோ படிக்க வைக்க முற்படும் நாம், அவர்களை சிறந்த இஸ்லாமிய உலமாக்களாக சமூகத்தில் உருவாக்குவதற்கு விரும்புவதில்லை.

இவ்வாறான ஒரு நிலையில் நாம் எவ்வாறு இஸ்லாமிய துறைசாரந்த நிபுணர்களை (சிறந்த உலமாக்களை) எதிர்பார்க்க முடியும். இதுபோன்ற மௌலவிமார்களை நாமே உருவாக்கி விட்டு அவர்கள் மீதே முழுமையான குற்றத்தை சுமத்துவதும் நாம் செய்யும் மற்றொரு தவறு.

அதேபோன்று இன்று எமது சமூகம் திடலிலா, பள்ளியிலா? ஓதலாமா ஓதக் கூடாதா? வேற்றுமையில் ஒற்றுமை என்று பல வீண் வாதங்களில் பிசியாக இருக்கின்றார்களே தவிர தீர்வுகளை நோக்கி சிந்திக்கவில்லை. இன்னும் ஒரு தரப்பு மாதம் தவறாமல் மூன்று நாட்கள் சென்றுவிட்டு வந்தால் தமது கடமைகள் நிறைவேறி விட்டது என்று நினைத்துக் கொண்டு இருக்கிறார்கள். இதில் சில படித்தவர்களும் கூட.

இதுபோன்ற வீண் வாதங்கள், பிரிவினைகள்  வேண்டாம், ஒற்றுமையே வேண்டும் என்று கூறினால், அது பித்அத், அதை பார்த்துக் கொண்டு இருக்க முடியாது, உண்மையை எத்திவைக்க வேண்டும் என்று இன்னொரு தலைப்பிலே வாதத்தை ஆரம்பிக்கிறார்கள். பொய்யான குற்றச்சாட்டுக்கள் சுமத்தப்பட்டு, இனவாதிகளினால் திட்டமிட்டு தாக்கப்பட்டுக் கொண்டும், ஒடுக்கப்பட்டுக் கொண்டும் தவித்துக் கொண்டிருக்கின்றது இன்று நமது  சமூகம். ஆனால் தமது கொள்கைகைள விட்டுக் கொடுக்க முடியாது என்ற நிலையில் நாம் இருக்கின்றோம்.

எந்தவொரு உண்மையான முஸ்லிம்களும் சுவர்க்கத்தை நோக்கியே நல்லமல்களை செய்கின்றார்கள். எந்தவொருவரும் இயல்பாகவே மார்க்கத்திற்கு முரணான எந்தவொரு செயலையும் செய்வதற்கு முற்பட மாட்டார்கள். நாம் இது தான் சரி என்று நினைப்பதை மற்றொரு சாரார் தவறென்று நினைக்கிறார்கள். நாம் தவறென்று நினைப்பதை மற்றறொரு சாரார் சரியென்று நினைக்கின்றார்கள். இதில் ஒருவேளை இரு சாராருமே சரியாக இருக்கலாம் அல்லது இரு சாராருமே தவறாக இருக்கலாம். ஆனால் எந்தவொரு உண்மையான முஸ்லிமும் வேண்டுமென்று நரகம் செல்ல வேண்டும் என்று பித்அத்களை செய்யமாட்டார்கள். எல்லாம் அறிந்தவன் அல்லாஹ்வே.

நன்றாக நினைவிருக்கட்டும், நாம் கூறுவது தான் சரி, அவர்கள் கூறுவது பித்அத், அவற்றை பார்த்துக் கொண்டு இருக்க முடியாது, உண்மையை எத்தி வைக்க வேண்டும் என்று கூறி தமது கொள்கை சார்ந்த எண்ணங்களையும், கருத்துக்களையும் மற்ற முஸ்லிம்கள் மீது திணிக்க முற்படுவதன் மூலம், உண்மையை நமக்குள் எத்தி வைக்கிறோமோ இல்லையோ, மறுபக்கம் இஸ்லாம் பற்றி ஒன்றுமே தெரியாத மாற்று மத சகோதரர்களுக்கு பாரிய தவறான தகவலொன்றை வழங்கிக் கொண்டே இருக்கின்றோம். நமது இந்த செயற்பாடுகள் மூலம் இஸ்லாம் பற்றிய தவறான சிந்தனைகளை அவர்களுக்கு எத்தி வைத்துக் கொண்டே இருக்கின்றோம். அவர்களை தவறாக வழிநடத்திக் கொண்டே இருக்கின்றோம் என்பதை ஒருபோதும் மறந்து விட வேண்டாம்.

அதன்படி முஸ்லிம் சமூகம் இன்று எதிர்நோக்கியுள்ள பிரச்சினைகளுக்கு அனைத்து முஸ்லிம்களும் அறிந்தோ அறியாமலோ பங்காளிகள் தான். ஆகவே வீணான வாதப் பிரதிவாதங்களை விட்டு நாம் ஒவ்வொருவரும் மாற வேண்டும். ஜம்மியதுல் உலமாவின் தீர்மானங்கள் பிழையாக இருந்தால் அதற்கு அவர்கள் மட்டும் பொறுப்பாளர்கலல்ல. நாமும் தான் என்பதை நினைவில் வைத்துக் கொள்ள வேண்டும்.

எவ்வாறாயினும் இப்போதிருக்கின்ற சூழ்நிலையில் அகில இலங்கை ஜம்மியதுல் உலமா என்ற அமைப்பின் கீழ் ஒன்றுபட்டிருப்பதே எமது சமூகத்துக்கு சிறந்தது. அந்த அமைப்பு நமது சமூகத்துக்கு முக்கியமான ஒன்று. ஆகவே அந்த அமைப்பில் உள்ளவர்களும் அங்கு மாற்றங்களை கொண்டு வர வேண்டும். அந்த அமைப்பை இஸ்லாமிய புத்திஜீவிகளும், சிறந்த உலமாக்களும் உள்ள அமைப்பாக கட்டியெழுப்ப வேண்டும். நாமும் அதற்கு பங்காளிகளாக இருக்க வேண்டும்.

ஏ.ஏ.எம். பஸ்லி
ஊடகவியலாளர் - அத தெரண

Tuesday, 24 December 2013

பசுமையான பள்ளிக்கால நினைவுகள்...


தனிமை வாட்டிக்கொண்டிருந்த ஈரமான இரவுப்பொழுதில் பல நினைவுகளோடு மனக்கதவை தட்டி தூக்கத்தை மறக்கடிக்க செய்கிறது பள்ளிக்கால ஞாபகங்கள்
மனத்திரையில் சிறகடிக்கும் சில நினைவுகளோடு தூக்கம் விட்டு சில நிமிடங்கள்..

பள்ளி கால ஞாபகங்களை மீட்டிப்பார்க்கும் போது மனசுக்குள் ஒரு வித்தியாசமான இன்ப உணர்வு..
நாம எவ்ளோ தான் வாழ்க்கைல முன்னேறினாலும், நம்மளோட ஆரம்பகாலத்தை நெனச்சுப் பார்க்கும்போது ஆச்சர்யமா இருக்கும்.

அது சில நேரம் சிரிப்பைத் தரும்.. சில சமயம் அழுகையை தரும்...
ஆனா அந்த நினைவுகள் என்னைக்கும் நம்ம மனச விட்டு நீங்குறதில்ல.

அதுபோலத்தான் எனக்கும் சில நினைவுகள் அப்பப்போ மனத்திரையில் சிறகடித்துக்கொண்டிருக்கும்...
அது சந்தோசமா அல்லது ஒரு வகை வலியா ஒன்னுமே புரியல்ல என்றாலும் அந்த உணர்வு மனசுக்கு சுகமா இருக்கு..

பாடசாலை வாசல் நோக்கி, ஆயிரம் கனவுகளோடு நுழைந்த,
எத்தனையோ மாணவர்களுக்குள் நானும் ஒருத்தன்..

ஸ்கூலுக்கு போறதுக்கு நேரமாச்சி எழும்புடா.. எழும்பு..
அம்மாட குரல் காலைல 6 மணிக்கே எழுப்பிடுவாங்க..
காலைல 6மணிக்கு எழும்புறதா?.. (எவ்வளவு கஷ்டம்னு இப்பதான் விளங்குது...)

ஸ்கூலுக்கு போறதுக்கு முன்னால அம்மாட கையால போட்டுத்தந்த கோப்பி..
அது வெறும் கோப்பியல்ல அன்பு பாசம் எல்லாம் கலந்தது..
வீட்ல இருந்து கொஞ்ச தூரம் நடந்துதான் போகனும்

வெள்ளை சேட் வெள்ளை காற்சட்டை
கழுத்தில் ஒரு பேக்..
ஏகப்பட்ட நண்பர்கள்..
நிறைய கற்பணைகள், கனவுகள்
கவலை மறந்து எப்போதும் சந்தோஷம்...
மீண்டும் கிடைக்காத அந்த நிமிடங்கள்
இன்னும் வட்டமிட்டுக்கொண்டிருக்கின்றன மனத்திரையில்..

பாட வேளைகளை கட் அடிச்சி புளியம்மரத்தடியில் அரட்டை அடித்த நாட்கள்
ஸ்கூலுக்கு கட் அடிச்சி நண்பர்களோடு சேர்ந்து பார்த்த படங்கள் ..
ஆசிரியர் இல்லாத நேரத்தில் வகுப்பறையில் போட்ட கும்மாளம்..
சின்ன சின்ன சண்டைகள் வித வித குதூகலங்கள் நிறைந்த அற்புத நாட்கள் அவை..

பள்ளி வாழ்க்கையைப் போலவே எப்பவுமே மறக்க முடியாத பாடசாலை தான் அறபா..
ஆரம்பம் முதல் உயர்தரம்வரை அறபா தான்..
இப்போ நூற்றிருபத்தைந்தாண்டு தாண்டி தலைவர்கள் பலரை உருவாக்கி சாதனைகள் பல புரிந்து கொண்டிருக்கின்றது நான் கற்ற அந்த பாடசாலை.

இலங்கை தீவெங்கும் அறிவொளி ஏற்றிடும் கலையகம் வெலிகம அறபா”..
பாடசாலைக் கீதத்தின் ஒரு வரி தான் இது..
காலைக் கூட்டத்தின் போது ஒவ்வொரு நாளும் கேட்கக்கூடியது..

சிறியவனாய் சென்ற எனக்கு சிந்திக்க கற்று கொடுத்ததும் அந்த அறபா..,
எனக்கு இப்போ ஒரு முகவரி கொடுத்திருப்பதும் அந்த அறபா தான்..,

முகவரி தந்த பாடசாலை
கூட இருந்த சொந்தங்களையும் நண்பர்களையும் பிரித்து விட்டது..

காலத்தின் தேவை ஊரையும் பிரிந்து உறவையும் பிரிந்து
நினைவுகளை மட்டும் சுமந்து கொண்டு ஒரு வாழ்க்கை..

புதுப்புது நட்புகள் கிடைச்சாலும் ஆரம்பகால நட்புக்களை மறக்கவே முடியல

நான் இழந்த அந்த இதமான நாட்களை
மறுபடியும் மீட்டுக் கொள்கின்றேன்..
பள்ளிப் பருவமதை பசுமையுடன்
திரும்பிப் பார்க்கிறேன் இந்த இதமான இராப்பொழுதில்
இரண்டு விழிகள் மட்டுமே துணையாய்…

Friday, 5 July 2013

முா்ஸியின் பதவி கவிழ்ப்பு மூலம் எதிர்பார்ப்பது ஜனநாயகமா?



எகிப்தின் வரலாற்றில் ஜனநாயக ரீதியில் தேர்ந்தெடுக்கப்பட்ட முதல் ஜனாதிபதி முஹம்மது முா்ஸி. நாட்டின் பெரும்பான்மை மக்களின் வாக்களிப் பின் மூலமே ஜனாதிபதியானார். ஜனநாயகத்தின் அடிப்படையில்தான் முர்ஸி ஆட்சிக்கு வந்தார். ஆகவே அங்கு இராணுவப் புரட்சி எதற்கு? அதனை அமெரிக்கா ஆதரிப்பதன் மா்மம் என்ன?
எகிப்தில் ஷரீஆ அடிப்படையிலான ஆட்சி உருவாகுவதை அமெரிக்காவோ மேற்கத்திய நாடுகளோ விரும்பவில்லை. இஸ்லாமிய அடிப்படையிலான ஆட்சி மாற்றம் எகிப்தில் ஏற்பட்டு விடக் கூடாது என்பதில் அமெரிக்கா மிகவும் விழிப்பாக உள்ளது.

இதேபோன்றுதான் முன்னாள் ஜனாதிபதி ஹொஸ்னி முபாரக் பதவி விலகியதை அடுத்து நாட்டின் ஆட்சிப் பொறுப்பை ஏற்றுக் கொண்ட எகிப்தின் இராணுவ ஆட்சியாளர்கள், அரச எதிர்ப்பு போராட்டங்களில் ஈடுபட்டிருந்த பொதுமக்களை அமைதியாக இருக்குமாறும் விரைவில் அங்கு மக்களாட்சியை ஏற்படுத்தி ஜனநாயகத்தை நிலைநாட்டுவதாகவும் உறுதியளித்தது. அவர்கள் உறுதியளித்தபடி மக்களால் தெரிவுசெய்யப்பட்வா்தான் முஹம்மது முா்ஸி.

இந்தநிலையில் எகிப்தின் ஆட்சிப் பொறுப்பை ஏற்றுள்ள இராணுவத்தினர் விரைவில் ஜனநாயக மக்களாட்சி முறை ஒன்று ஏற்படும் என்ற அறிவித்தலை அமெரிக்க ஜனாதிபதி பராக் ஒபாமா வரவேற்றுள்ளார். அமெரிக்கா எதிர்பார்க்க கூடிய ஜனநாயகம் எவ்வாறானது? மக்கள் ஆதரவு பெற்ற தலைவர்களை ஒழித்துக்கட்ட அமெரிக்க தலைவர்கள் எப்போதும் முயன்று கொண்டே இருப்பார்கள்.

அரபு உலகில் ஜனநாயகம் என்பது நீண்ட நெடிய வராலாற்று பாரம்பரியம் கொண்டது. இருந்தபோதிலும் அரபுலகின் ஜனநாயகம் மேற்குலக சக்திகளால் எப்போதும் நசுக்கப் பட்டே வந்துள்ளன. அரபுலகில் ராணுவப் புரட்சி ஏற்படுத்தி ஆட்சிகளைக் கவிழ்ப் பதே அமெரிக்காவின் அடிப்படைப் பணியாக இருக்கின்றது.

இதேவேளை முா்ஸிக்கு ஆதரவானவா்களும் தொடர் போராட்டங்களை நடத்தி வருகின்றார்கள். அதேபோன்று இராணுவ புரட்சி மூலம் ஏற்படுத்தப்பட்ட புதிய ஆட்சியை ஏற்கமாட்டோம். அந்த ஆட்சிக்கு ஒத்துழைப்பு தரமாட்டோம். கைது செய்துள்ள முா்ஸியையும் மற்ற தலைவா்களையும் உடனே விடுதலை செய்ய வேண்டும் என்று முஸ்லிம் சகோதரத்துவ கட்சி தெரிவித்துள்ளது. ஆகவே ஜனநாயக முறைப்படி மக்களால் தெரிவுசெய்யப்பட்ட தலைவரை பதவி நீக்கிவிட்டு சா்வதேசம் எதிர்பார்கக்கூடிய ஜனநாயகத்தை மீண்டுமொரு முறை எகிப்தில் உருவாக்க முடியுமா?

There was an error in this gadget